З 21 па 25 верасня ў Гродне пройдуць бясплатныя экскурсіі, прымеркаваныя да Сусветнага дня турызму. Гараджанам прапануюць наведаць музеі і храмы, прагуляцца па яўрэйскім Гродне і даведацца, дзе жыхары горада елі прысмакі больш за 100 гадоў таму. Запісацца можна будзе толькі на працягу трох гадзін. У 2025 годзе месцы на бясплатныя экскурсіі да Дня горада разабралі за паўдня, таму арганізатарам давялося дадаць новыя групы.
Як запісацца на экскурсіі
Удзельнічаць можна толькі па папярэднім запісе. Колькасць месцаў абмежаваная. Адзін чалавек можа адначасова запісаць не больш за двух удзельнікаў, паведамляе Гродзенскі гарвыканкам.
Запісацца можна 18 верасня з 11:00 да 14:00 па тэлефоне 8 (0152) 64−28−51.
Праграма бясплатных экскурсій
21 верасня
- 11:00 — экскурсія па Барысаглебскай (Каложскай) царкве;
- 12:00 — галерэя «Грышук Арсенал»;
- 15:00 — «Гісторыя з густам». Удзельнікам раскажуць, якія ўстановы з прысмакамі наведвалі гродзенцы больш за 100 гадоў таму;
- 17:30 — «Гродзенскія анёлы». Экскурсія пройдзе па праваслаўных могілках на вуліцы Антонава;
- 18:00 — «Любімае Гродна». Маршрут пройдзе ад вуліцы Дарвіна праз Стары мост да гістарычнага цэнтра.
22 верасня
- 13:00 — экскурсія па Царкоўна-гістарычным кабінеце Гродзенскай епархіі;
- 17:30 — «Яўрэйскі Гродна».
23 верасня
- 11:00 — Музей гісторыі пажарнай службы Гродна;
- 13:00 — кафедральны сабор Пакрова Прасвятой Багародзіцы.
24 верасня
У гэты дзень а 16:00 адначасова пачнуцца тры экскурсіі:
- па Царкоўна-гістарычным кабінеце Гродзенскай епархіі;
- па Музеі гісторыі Гарадніцы;
- па Музеі Максіма Багдановіча.
25 верасня
- 13:00 — анатамічная экспазіцыя «Гродзенская кунсткамера».
Сусветны дзень турызму адзначаюць штогод 27 верасня. Менавіта ў гэты дзень у 1970 годзе прынялі статут Сусветнай турысцкай арганізацыі. Само свята заснавала Генеральная асамблея арганізацыі ў 1979 годзе.
У 2026 годзе яго тэма — «Лічбавы парадак дня і штучны інтэлект для пераасэнсавання турызму» (Digital Agenda and Artificial Intelligence to Redesign Tourism).
