У вёсцы Піронім Слонімскага раёна выставілі на продаж шэсць пустуючых дамоў. За кожны просяць 45 рублёў. Усе дамы знаходзяцца на адной вуліцы, прадаюцца без аўкцыёну, а плошча ўчасткаў дасягае 0,53 га. Піронім размешчаны прыблізна за 17 км ад Слоніма.
Усе шэсць дамоў знаходзяцца на вуліцы Цэнтральнай. Яны драўляныя, пабудаваныя з 1917 па 1969 год. Плошча дамоў — ад 41,3 да 60,5 кв. м, участкаў — ад 0,3 да 0,53 га. У дварах захаваліся пуні, прыбудовы, веранды і склеп.
Што можна купіць за 45 рублёў
Найбольш стары з выстаўленых дамоў знаходзіцца па адрасе Цэнтральная, 72. Яго пабудавалі ў 1917 годзе. Плошча — 42,5 кв. м. Затое ўчастак у яго найбольшы — 0,53 га, або 53 соткі. Ёсць таксама прыбудова, бярвёнавая пуня і склеп.
Яшчэ адзін cтогадовы дом — №91 — пабудаваны ў 1918 годзе. Ён найбольшы ў падборцы: 60,5 кв. м, участак — 0,31 га. У дома ёсць веранда.
Астатнія чатыры дамы з’явіліся ўжо пасля вайны:
- №53 — 1948 год, 46,8 кв. м, участак 0,47 га, ёсць прыбудова і веранда;
- №62 — 1954 год, 48 кв. м, участак 0,3 га, дзве прыбудовы і бярвёнавая пуня;
- №37 — 1962 год, 46,8 кв. м, участак 0,32 га;
- №67 — 1969 год, 41,3 кв. м, участак 0,42 га, ёсць дашчаная пуня.
Даведацца, якія з шасці аб’ектаў яшчэ даступныя, і дамовіцца пра прагляд можна ў Дзераўноўскім сельвыканкаме.
Вёска вымірае
У 2016 годзе ў Піроніме заставалася каля 60 жыхароў, і ўжо тады там было нямала закінутых дамоў.
Калісьці ў вёсцы былі клуб і лазня, але да 2016 года яны ўжо не працавалі. Цяпер у населены пункт ездзіць аўталаўка — крама зачыненая. Дарога ў вёсцы заасфальтаваная.
Піроніму больш за 400 гадоў
Сама вёска даволі старая. Першае вядомае пісьмовае згадванне Піроніма адносіцца да 1610 года. А ў 1940 годзе вёска нават была цэнтрам Піронімскага сельсавета. Тут жыло каля 600 чалавек.
Побач захаваліся і гістарычныя месцы. У наколіцах Піроніма ёсць старажытныя курганы, старыя земляныя валы, урочышча Калодзішча з вялікімі дубамі і рэшткі вадзянога млына «Бор». Вёску атачаюць лясы, побач працякаюць невялікія рэкі і ручаі.
Чаму дамы прадаюць за 45 рублёў
У Беларусі пустуючыя дамы прадаюць па спрошчанай схеме ў межах указа № 116, прынятага ў 2021 годзе. Яго мэта — вярнуць у выкарыстанне закінутыя дамы і зямельныя ўчасткі.
Калі нерухомасць не ўдаецца прадаць па рынкавым кошце, яе цану могуць зніжаць аж да адной базавай велічыні — цяпер гэта 45 рублёў. У некаторых населеных пунктах такія дамы дазволена адразу прадаваць за базавую велічыню без аўкцыёну.
За студзень — травень 2026 года ў Беларусі прадалі 644 пустуючыя дамы, з іх 358 — за адну базавую велічыню.
Слонімскі раён апынуўся на другім месцы ў краіне па колькасці прададзеных дамоў — 31 аб’ект. Прычым 25 з іх купілі ўсяго за 45 рублёў.
Цяпер, судзячы па Адзіным рэестры пустуючых дамоў, у Слонімскім раёне на продаж выстаўлены 13 дамоў. Амаль палова з іх — тыя самыя шэсць дамоў у Піроніме.
