У Гродне плануюць новы жылы квартал у раёне праспекта Лебедзева і вуліцы Маслакова. На ўчастку каля Томінскага лесапарку хочуць пабудаваць пяць шматкватэрных дамоў вышынёй ад 9 да 19 паверхаў. Грамадскае абмеркаванне праекта пройдзе з 12 па 26 кастрычніка 2026 года.
Двары без машын і памяшканні для крамаў
Праект забудовы распрацавала ААТ «Гроднажылбуд». Тут будзе пяць дамоў пераменнай паверхавасці — 9, 11 і 19 паверхаў. Кампанія таксама выступае заказчыкам будаўніцтва.
Участак з поўначы і захаду мяжуе з сядзібнай забудовай, з поўдня — з вуліцай Маслакова, з усходу — з лесапаркам «Томінскі лес».
Двары плануюць зрабіць без машын: паркоўкі размесцяць за іх перыметрам, а ўнутры ўладкуюць зоны адпачынку, дзіцячыя і спартыўныя пляцоўкі.
На першым паверсе дома № 4 прадугледжаны памяшканні для аб’ектаў сацыяльна-бытавога абслугоўвання.
Праезды арганізуюць з Чырвонасцяжнай
У квартал прадугледжаны два праезды з вуліцы Чырвонасцяжнай. Праезд у гаражны кааператыў «Хімік» плануюць рэарганізаваць з боку вуліцы Славінскага.
Як паглядзець праект і пакінуць заўвагі
Азнаёміцца з экспазіцыяй новай забудовы можна з 12 па 26 кастрычніка па адрасе: плошча Антонія Тызенгаўза, 3. Яна будзе працаваць па буднях з 8:00 да 13:00 і з 14:00 да 17:00.
Прэзентацыя праекта адбудзецца 22 кастрычніка ў 15:00 па тым жа адрасе, у кабінеце № 1.
Заўвагі і прапановы прымаюцца па 26 кастрычніка на электронныя адрасы [email protected] і [email protected]. У лісце трэба пазначыць «грамадскае абмеркаванне».
Вынікі апублікуюць на сайце Гродзенскага гарвыканкама.
