Беларускія брэнды «Лідскае» і Daloni Coffee прадставілі калабарацыю — каву, ферментаваную на цёмным піве «Аксамітная». Пра новы прадукт распавялі ў Threads піваварнай кампаніі. Асобна набыць дрып-пакеты не атрымаецца, аднак пакаштаваць гэтую каву ўсё ж можна.
Для «піўных» дрыпаў выкарысталі зерне сорту Ethiopia Yirgacheffe, якое прайшло аэробную ферментацыю з нямецкім хмелем Mandarina Bavaria і півам «Аксамітнае». Як пазначана на ўпакоўцы, дзякуючы такой тэхналогіі напой атрымаў незвычайны смакавы профіль з соладавымі нотамі, адценнямі жытняга хлеба, цытрусавай свежасцю грэйпфрута і лёгкай даўкасцю чорнага чаю.
Саму каву называюць глытком «свабоды, бесклапотнасці і маладосці».
У каментарыях да публікацыі карыстальнікі адразу пачалі цікавіцца, дзе можна набыць такую каву.
Прадстаўнікі Daloni Coffee патлумачылі, што дрып-пакеты, створаныя адмыслова для калабарацыі з «Лідскім», асобна ў продаж не паступяць. Аднак гэтая кава ўвайшла ў гастранамічны набор «Смак Радзімы». У ім яна хаваецца ў дрып-пакетах з назвай «Ліда».
Набор дрып-кавы «Смак Радзімы», прысвечаны гарадам краіны, кампанія Daloni Coffee прадставіла раней.
У калекцыю ўвайшлі напоі, натхнёныя Мінскам, Брэстам, Гроднам, Віцебскам, Магілёвам, Гомелем, Бабруйскам, Лідай, Пінскам, Лунінцам, Полацкам, Рагачовам і Глыбокім. Для часткі гарадоў выкарысталі монасарты кавы, а для абласных цэнтраў і Мінска распрацавалі аўтарскія кававыя сумесі.
